دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

نور الليالى 

يا قمر يبدأ هلالى

الوطن ساكن جوارحك

والغلابة فى نن قلبك

فى حقوقهم لا تبالى 

أى سلطة مستبدة 

فى المرافعه مليكش زى 

فى دفاعك ألف ضى 

فى ضميرك نبض حى 

ينشر النور فى الليالى 

يا نبيلنا يا هلالى 

يا سند للمستضعفين

عمال و طلبة و فلاحين

كلمة الحق المبين

وقفة الحر المثالى

 يا نبيلنا يا هلالى 

ينتفض دم العروق

لما تتمس الحقوق

ترفع الرايات لفوق

مسحراتى الغضب

و الاحتجاج

و الشوق

بحلم بفك الطوق

من ليل غميق لشروق

و الصوت يشق الحلوق

و الروح بتنسج م الجروح موال

يا الف اه يا عين

يا ألف اه يا ليل 

 علمنى موج البحر

ان الزبد زايل

علمنى صبر النخيل

ان الوتد شايل 

مهما تكون الرياح

الجدر مش مايل 

ضل الشحر ممدود

لقلوب ما تتمايل 

دواها حلم وطريق

ما يعرف المايل

و مهما طال البعاد

ومهما زاد العناد

مسحراتى بطول البلاد

اصرخ ليلاتى

إصحوا و فوقوا

لكل اتى

رمضان كريم

شهر و عظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى وفى انتظار

الأمة ترفع راية إنتصار

رمضان كريم

يا نايم إصحى

وحد الرزاق