باكتب عشان مابكيش

فرح وموالد أوليا ودراويش 

عايش باموت علي غربة تشبهني

مين اللي قال ان الغريب بيعيش 

أكمني وحدي

 خلعت باب البيت

عشان تفوت الريح وماتخبطش 

أكتب بحب الحب مايلخبطش 

عايز تفوز أكتب من المكتوب

الصبر ناعسة ياعم مش أيوب

الحب مش بيت راحة ولا جنة 

الحب رقة وبطش

الدخلة قاعدة وعينها ع الحنة

أدخل ماتستعبطش 

شوف مين كتبها بدمه

شوف مين فاز ! 

ساكن في دور أرضي بقزاز مكسور

زي اللي ذاكر في عمود النور 

في البيت سبرتاية ولمبة جاز 

كاتينة بتقضي يادوب الواجب

العين بتعلي ساعات عن الحاجب 

عين الحسد واللوم 

قاعد تهد ف كومة من أمثال 

لو امتثلت تأخرك أميال 

عن المقدر ع الجبين والريح 

قال : تستريح لما ترد الباب !!

خلعته بدري زمان في خامس سطر 

أكسرها وانشرها ماتستعبطش

الشنطة ركبت قبل مني القطر 

وانا قاعد اتسلطن في موالي