مسحراتى بطول وعرض النيل 

قلبى يرفرف فوق شواشى النخيل 

 والشمس حاميه زى نار المنقد 

لجل البلح يحمَرّ.. ويعنقد 

يا نخل كلك ألاطه 

لما تميل بالسباطه

أيام ما كان  إنسان جُوّه الخيام نايم 

كنت انت عندك سلالم 

ولاَ عشر تدوار 

واقف وعينك ع البلاد حارس 

فوق القرى زى الحصان والفارس 

وفى المدارس قالوا عنك نبات!! 

. 

ولو اللى فات مكتوب له تانى الرجوع 

حيحكى عنك لما كنت صغير 

ما تطولش شجر النبق يا قصير 

يا نخل لك أسماء 

عند اللى جدره في التراب والماء 

عم اسماعين بيقول: دى فتحيه 

ودي بهيه.. والدكر رمضان 

أسماء ولاده فى ندهة الحنيه 

يا نخله مايله بشعرها ع الميه 

زى الصبيه قاعده تتسرّح 

تشوف جمالها فى المرايه وتفرح 

وعقلها يسرح مع الموال 

سرب الحمام طالق جناحه الفضى 

وقلبى طالق غنوته علي أرضى 

لجل اللى بعدى يعيش فى أجمل حال

بالطبله دقه        وبقلبى دقه 

ياللى سامعنى   ما تقولش لأ 

يا نخل يا بو الشواشى فى السما مِرْتِفْعَه 

يا عالى بين الشجر فى المجـد والـرِّفْعَـه 

قل لى انت شايف إيه 

قال لى بصوت فرحان: 

شايف طيور الأمل على مصر مِنْدِفْعَـه 

اصحى يانـايم 

رمضان كريم