دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد 

-----------------

لسه الخطاوى بليدة

و الثورة شاهده و شهيدة

يا نهار يا سارح ف المدى

يا فجر من بعدك ندى

يا شمس يا ضى الطريق

يا عدل يا روحنا البعيدة

يا الف اه يا ألف تنهيده

سكتنا 

مهما زاد الوجع و الويل

مهيش بعيدة

وكل ما زاد البعاد

كل ما قرب المعاد

يا حلم عابر للعناد

جايلك اوان تنطق

بنور الصبر و تشقشق

بعزم الفقرا تتحقق

بنار الثورة و بنورها

هنغزل قطننا بنولها

وكلمة حق هنقولها

يا زراع الامل و الضى 

يا اصحاب الضمير الحى 

نهارنا بعد ليلنا جى 

نهارنا بعد ليلنا جى

مسحراتى الغضب

و الاحتجاج

و الشوق

الجدر مادد لفوق

بحلم بفك الطوق

من ليل غميق لشروق

والصوت يشق الحلوق

و الروح بتنسج

من الروح موال

الليل طويل

لكن النهار جوال

انا مش عديم البصر و لا قليل البصيرة

عارف عدوى بجد من العدو العيرة

ياعم يا اللى التراب عشش على عيونك

الرؤية واضحة و الطريق معروف

منتاش قليل الحيلة او عديم الشوف

احسبها حسبة وطن مش حسبة لعصابة 

تجار وطن أو دين بايعينا لديابة 

ومهما زاد العناد

و مهما طال البعاد

صوت الجموع 

له أوان و معاد

مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

• وحد الرزاق