احلي فرجة في الدنيا لما اتنين طغاة يقعوا في بعض!!

الامبراطور بوكاسا زعيم دولة افريقيا الوسطي_ كما اعتقد_ الف رحمة ونور عليه..عندما يختلف مع احد معارضيه..يدبحه ..يشفيه..يحط لحمه في التلاجة الامبراطورية..وقت المزاج يحب يقزقز..تسالي:يقرمش ودان المرحوم..يمزمز بعينيه..يمصمص عضمة مناخيره..اكل ناس هاي لايف.. ابهة..ماتعرفوهمش ..بعيد عنكم !!

في السهرة..يحمر كبدة معارض يشوحها بحتة دهن طرية من مؤخرته.. اللي فوق الموزة مباشرة مع ضلعته متبلة ومشوية..استاذ فن طبيخ..شغل شيف شربيني..استاذ علي تقيل الله ينور  !!

( راجل مجدع بصحيح.. دكر.. بيني وبينكم انا معجب بشخصيته..نفسي اعمل زيه تمام .. لو ربنا كرمني.. ووهبني ميكروفون وعشرة ..خمستاشر عسكري امن مركزي..من العيال اللي عايشين في الصحرا..بهايم..تقولهم:يمين..يمين ..شمال..شمال..النفر منهم يفطر جوز سحالي وفارتين سمان..يتغدي حدايتين علي عشرين عرسة عشار من اللي يحبهم قلبك!!

ساعتها يبقي طاقة القدر اتفتحت لي !! ..ح استولي ع الحكم ف نجعنا.. بس ماتقولوش لحد.. امسك امبراطور النجع القبلي كله.. اقسم بالله :اللي يرفع راسه في النجع ح اشيله من علي وش الارض..اهئ..اهئ..

اوعدكم شعبي الجميل  : ح ابقي معاكم اوسخ من عمكم بوكاسا في عز شبابه ميت مرة..اخليكم تشوفوا اللي عمركم ما ح تشوفوه!!

نص النجع التخين الملظلظ.، افرمه..اعمله كفته..افرقه  ع الحبايب..النص التاني.. الغلابة.. اعملهم عجينة طعمية.. ابيعها بنص التمن للواد سكنانه بتاع الفلافل اللي فارش عند الكوبري ..احول تمنهم لحساباتي ببنوك ابوظبي وسويسرا_ اكيد كلمة "افرم" دي تعبير سياسي اصيل..عجبكم..يفكر العواجيز زيي بذكريات سبعينية قديمة حلوة!!_ ..

ناقص انا غلابة ولاد كلب تقعد تحاسبني..شباب وناس عديمة رباية بصحيح تقول نعمل ومانعملش..خلق تخاف ماتختشيش!!) 

يقال ان عمو بوكاسا.. عنده ٣٦٥ زوجة وجارية ومحظية..(محسوبكم جاهل..ميعرفش الفرق بين الزوجة والجارية والمحظية..علمها عند ربي وعند المرحوم بوكاسا !!)

المهم الراجل الامبراطور السكره ده..فرنسا بنت المؤذية عملت عليه انقلاب..ابو البكاسيس ديله في اسنانه..نط في اقرب طيارة..معاه حريمه وعياله..سوق يااسطي..علي فين يابو الباكسيس..علي فين يابو البكاسيس؟؟!!..مفيش ولادولة ترضي تدخله ..الندالة طبع ثابت عند الدول.. الدول العظمي بالذات..ياكلوك لحم ويرموك عضم !!

مفيش غيره ..حبيبه..حبيبنا امين القومية العربية والافريقية ..ملك ملوك العالم..شيخ مشايخ قبائل افريقيا..الفاتح العقيد القذافي..الطغاة لبعضهم برضه في الزنقة ربنا مايوريها لعدو ولاحبيب..( ماسورة مجاري في سرت ولا حفرة في تكريت!!)

عمو الامبراطور اقام في ليبيا..القذافي مانع الخمور..بسيطة..بعد مداولات..اتحلت المشكلة ..عمو القذافي وافق ان الاسطي بوكاسا يصرح له بالخمرة زي الشاعر العراقي الكبير مظفر النواب في ليبيا !! 

فضلت مشكلة تانية.. جلالة الامبراطور ونساوينه وعياله واخدين ع الصرف والبعزقة ..القذافي احيانا تيجي له الجنونة ..يبقي نتن طحن ..يدفع بالقطارة ..

فرنسا بنت اللئيمة وبنوك اوروبا وامريكا فرضوا حظر علي اموال عمك الامبراطور المهربة للخارج..نعمل ايه؟؟!

فاعل الخير اللي حل مشكلة الخمرة ابتدأ يتدخل .. يحنن قلب العقيد..

القذافي مزرجن..في النهاية وافق يدفع للامبراطور ستة مليون دولار بشرط يأسلم( ايامها كانت موضة التبشير الاسلامي في افريقيا بمعرفة العقيد)!!

ينطق الشهادتين ع التليفزيون قدام العقيد..عمي الامبراطور قال : بسيطة بدل الشهادتين ياخد خمسين شهادة استثمار!!قالوا له: بس فيه حاجة بسيطة قوي عشان الاخ العقيد يقبل اسلامك..لازم تتطهر..تختتن.. _ قال : يعني ايه ختان ؟ قالوا: حاجة كده بسيطة نقص حتة جلدة بسيطة من البتاع بتاعك شرط في ذمة  القذافي واليهود كمان !!

الراجل انزعج ..قال : ياعيب الشوم..اقول ايه للحريم ال ٣٦٥ بتوعي لما يشفوا البتاع  اقرع زلبطه وناقص شفه ؟؟!!

قالوا له: ولاحاجه..البلد كلها قرعة..جات علي بتاعك يابو البكاسيس !!

قال: خايف يتعور!!

قالوا له: ولاتخاف ولاتشيل هم..العقيد بنفسه ح يقف ع المقص !! 

بوكاسا اتكل علي الله ونطق ..القذافي قطع البتاع..بعد كام.يوم..بعت مليون دولار بس..

_ فين باقي الحساب يابو اسلام؟؟(قصده اسلام القذافي ابن العقيد)..كل يوم بوكاسا يبعت..عايز باقي حساب العملية..عمنا العقيد عمل اطرش..مص ع الباقي لمونه..الامبراطور ركبه ميت عفريت.._ قولوا للعقيد يجيب باقي الحساب يا اسيب دين ام القذافي!!

القذافي رد قال:قولوا للحاج بوكاسا..دخول الحمام مش زي الخروج منه ..لو ساب ديننا ..يبقي مرتد وح نقص رقبته !!

بوكاسا سمع كده..طلع يجري ع التليفون:يا سفير فرنسا..الحقني يابا الحج..حصل كذا وكذا..الحقوني!!

بوكاسا يضرب كف بكف ويصرخ :ادخل دين القذافي يقص بتاعي..اسيب دينه يقص رقبتي..الحقيني ياخالتي فرنسا..

بالفعل تم اعطائه حق اللجؤ السياسي لفرنسا..نفد برقبته من القذافي !!

الفاتحة لروحهم جميعا..ناس طيبين بجد..فين زمن الفن والجنون الجميل..اه.. يااخوانا : مايفضل ع المداور غير شر البقر..واللي يشوف مرات ابوه يقرا الفاتحة لروح امه!!!!