أيمن موسى اتمسك يوم من رمسيس 6 أكتوبر 2013 و اتحط في قضية تجمهر فيها فرد 68، القضية أتوجه له قائمة التهم المعتادة و اتحالت للجنايات، عشان يتحكم عليهم كلهم ب 15 سنة سجن مشدد و خمس سنين مراقبة.

بعد سنة و نص من الحكم النقض اترفض للقضية كلها، و بقى حكم ال 15 سنة حكم نهائي بات غير قابل للطعن عليه.

عدد كبير من أفراد القضية خرج بالفعل ف السنين اللى بعدها في فترة لجنة العفو الرئاسي من 2016 لحد 2018 في قوائم عفو متتالية، أغلبهم من الطلبة اللى كان أيمن منهم، لكن نصيبه مجاش من ضمن الأسامى اللى ميفرقش عنها أي حاجة الا الصدفة، و من بعدها و القضية اتقفلت و مبقاش بيطلع منها حد عفو تانى.

يوم 6 ابريل الجاى أيمن هيكمل 7 سنين و نص، يعنى نص المدة المحكوم عليه بيها اللى هي 15 سنة.

القانون بيسمح بالأفراج الشرطى عن المسجون اللى بيكمل نص مدة حكمه و ده المخرج القانوني الثاني الوحيد غير العفو الرئاسي.

ساعدونا نوصل صوتنا عشان حرية أيمن, الطالب المجتهد، و الرياضي العظيم، و اللى اتبهدل و فوق الوصف اتظلم، اللى اتحبس عنده سنة 19، دلوقتى تم ال27، و أحسن سنين حياته ضاعت بلا ذنب.

ساعد بالتوقيع على العريضة ديه للمطالبة بالأفراج عن أيمن بنص المدة

https://www.change.org/FreeAymanMoussa