رمضان كريم لزياد

الرمضنة الأولى

الناس مداين

جرب وعاين

فيه قلب مخلص

وقلب خاين

وورد يفتح

جوه الزنازن

واصحاب بتسند

واصحاب توازن

وكره مخفي

وعشق باين

وناس بتسعى

من قبل تسعة

وناس تكسل

تاكل وترعى

وفيه زيادة

ملوك وسادة

حرير ستاير

ريش في الوسادة

وناس بتشرب

مر وترضى

وناس ما تشرب

الا زيادة

صوت الادان طالع من باب سعادة

لحد باب الفتوح

القلب  في الحب لو كان له ارادة

كان فضل مفتوح

والحلم مهما اتخنق 

وعلى باب زويلة اتشنق

هترد فيه الروح

الواد زياد ابن العليمي

شاب طويل

اطول من المدنة 

بيسابق الاحلام

كأنه فرد يمام

جوه سما بلادنا

بيرسم الاوطان

غصبن عن السجان

في ضحكة اولادنا

رمضان كريم يا زياد

حتى واحنا بعاد

لسه على ميعادنا