قطب جبينه وركز نظره ناحيتى وقال :

بقى انت مش عاجبك مشروع المونوريل ؟

فسألته : ايه المونوريل ده ؟

              يا عم كلمنى عربى !!

فرد قائلا : أيوه بقى استعبط ..

                مشروع القطار الكهربائى السريع اللى هيربط بين العين السخنة على البحر الأحمر والعاصمة الادارية والعلمين الجديدة على البحر المتوسط ..

أنا : أيوه طبعا مش عاجبنى وشايفه إهدار 

       لثروات البلد ومستقبل الاجيال ..

فقال : عشان انت نظرتك محدودة وتفكيرك 

           ضيق  ..

قلت له ازاى يا جهبذ زمانك ؟

قال : انت عارف ان كل مجتمع بيتقدم 

         بالصفوة من رجاله ..

وعشان الصفوة تعرف تفكر وتشتغل وتمشى بالبلد للأمام لازم نوفر لها كل أسباب الراحة عشان يفكروا ويمخمخوا ويشتغلوا ويفتحوا لنا المسارات المقفولة ..

أنا : يا سلااااام ؟

هو : وحياة السلام يا اخويا ،

       عايزنا بقى نسيبهم يا ابو مخ تخين يعانوا من زحمة الطرق وكلاكسات العربيات والصداع اللى انت شايفه ده واللا نضحى بتلاتة مليار دولار ونرحمهم من الغوغاء عشان يتفرغوا وقريحتهم تشتغل ويورونا اللى عمرنا ما نحلم بيه ؟

انا : انت بتتكلم جد ؟

قال : اسكت شوف المفاجأة  اللى جاية اللى بنحضر لها واللى هتبقى خبطة القرن بجد واللى مش بس هتدخلنا موسوعة جينيز باعتبارها الاولى فى المنطقة وعدد من القارات ، دى كمان هتعمل قفزة فى السياحة لم تحدث من قبل ..

انا : وااااو ..

أنا : مفاجأة وبتحضروا لها ؟

      الأول مين انتم اللى بتحضروا لها ؟

      وايه هيا المفاجأة  ربنا يكفينا شر خواذيقكم ..؟

قال : انت عارف معنى كلامى وبتستعبط ..

        خلى بالك بقى ساعتها لا هتقول لى  فنكوش قناة السويس الجديدة ولا مزارع السمك اللى رفعت اسعار السمك ولا الحاجات التانية اللى مابنعرفش نرد عليكم فيها دى ..

انا : يا عم قول بقى صدعتنى ..

هو : #مشروع_التلفريك ..

شبكة تليفريك هوائى رايح جاى تربط مصر شرقا وغربا وشمالا وجنوبا وشوف بقى عينك ما تشوف الا النور ..

انا : نور ايه ربنا يضلمها فى وشكم ويريحنا

       منكم .. 

       لسه ما خلصناش من بلوة المونوريل تقول

       لى تلفريك ؟

هو : عشان مخك ضيق وطول عمرك دقة 

       قديمة ودماغك فلاحى فاكر ان الدنيا كلها

       فاس ومقطف ..

      عارف شبكة التلفريك دى هتعمل ايه ؟

أنا : قول يا فذلوك ..

هو : طبعا انت عارف ان السياحة فى تراجع من 

       بعد ثورتكم المشئومة مش بس عشان 

       سوء الادارة زى ما انتم مصدعين دماغنا 

       لا ..

       ده عشان السياح حصل عندهم شيئ من 

       الملل ..

انا : ملل ؟

هو : ايون ..

       مفيش غير شرم الشيخ والغردقة والاقصر   

       واسوان والاهرامات وابوالهول ..

       رايحين جايين مفيش غير دول ..

       برده حاجة تزهق ..

خصوصا بقى انهم بقوا يشوفوا توت عنخ امون عندهم والقطع الأثرية مرطرطة عندهم بعد سرقة وتسريب آلاف القطع ..

واوعى تقول لى انه ده فساد دولة زى ما بتقعد تغنى ع الناس ..

وشوف بقى العقول الصاحية المتكلفة فكرت ازاى ؟

أنا : قول يا فصيح عصرك وأوانك !!

هو : شبكة تلفريك هوائية تلف كل ارجاء مصر .

والسايح من دول مش يروح يتفرج على حجر واللا تمثال واللا شعب مرجانية فى البحر ،،

لا .. ده احنا هنخليه يتفرج على حياة بشرية يستحيل يعرف يشوفها غير عندنا ومن فوق وهو قاعد فى التليفريك من غير لا زحمة مرور ولا اشارات ..

انا : ازاى يا ابو العريف ؟

هو : تخيل بقى لما فى القرن الواحد والعشرين السايح من دول يشوف بعينيه العشوائيات بتاعنا سواء فى القاهرة او فى محافظات بحرى والصعيد ..

وشوف بقى لما السايح يشوف ازاى فيه بشر  فى عصر العولمة عايشين بلا خدمات او بخدمات متدنية ورغم كده عايشين ومبسوطين وبيتجوزوا ويخلفوا ولسه عندهم أمل فى مدرسة تعلم عيالهم وبيت فى المستقبل يضمهم ..

هو ده الإعجاز البشرى اللى لو السايح لف العالم على كعوب رجليه لا ممكن أبدا يشوف مناظر زى دى ..

مش تقول لى ابوالهول والاهرامات وشوية الحجارة ..

وشوف بقى الدعاية اللى هتحصل وعشرات ملايين السياح اللى هييجوا يتفرجوا على عشوائياتنا اللى ملهاش مثيل وشوف لما يبقى راكب تلفريك من رشيد وبلطيم ويعدى على بحرى وينزل على الصعيد ويشوف بقى حلاوة عشوائيات بنى سويف والمنيا واسيوط وقنا واسوان وشوف علامات البهجة والدهشة على الوجوه ..

وشوف بقى الإبهار لما رحلة العودة تمر بالسايح ع العاصمة الادارية ويشوف بعينه أعلى مئذنة وأعلى برج فى افريقيا ويشوف كمان النهر الأخضر وأحدث وأكبر مدينة ملاهى ويطلع منها يتفرج على أبراج مدينة العلمين الجديدة وهيا بتناطح السحاب ..

ويقعد يفكر فى الإعجاز العبقرى اللى جمع بين النقيضين فى أرض بلد واحدة .. 

قمة الرخاء والبغددة مع قمة الشقاء والبؤس والحرمان فى ارض واحدة وشعب واحد ..

وشوف الأعداد الرهيبة من السياح دول ممكن تدخل مليارات قد ايه ..

وعد فلوسك بقى يا ميشيل يا صفتى ..

هييييه ؟ 

مالك يا ابنى انت روحت منى فين ؟

شكلك فيصت وروحك هتروح منك ..

لا يا عم أنا أقوم أحسن بدل ما تروح فيها وتجيب لى مصيبة واصحابك يقولوا انى تآمرت عليك ..

وكنت على وقع تخريفه أتذكر قول ربى سبحانه :

            ( وَالْخَيْلَ وَالْبِغَالَ وَالْحَمِيرَ لِتَرْكَبُوهَا وَزِينَةً ۚ وَيَخْلُقُ مَا لَا تَعْلَمُونَ )

وأنظر اليه وكأنه مخلوق جاء من كوكب بعيد أو أنه ممن ينطبق عليهم قول الله فى الآية الكريمة : ( ۚ وَيَخْلُقُ مَا لَا تَعْلَمُونَ )

فهتفت فيه وهو ينصرف قائلا :

                             روح يا شيخ الله لا يرجعك ..