مسـحـراتي وصنعتي حــداد

يا مهوّن الليل والشقا يا رب

لو كان بينطق كان جاوبني الجماد

ماضي الزمان كان الحديد له قلب

بيحس بالإيد اللى بتربّي

ويحِن ليها زي إبن وأب

دار الزمان.. والدنيا قسّايه

صبح الحديد بيلاوع

ولا عمــره بيطـاوع

غير تحت عزم المطرقه والنار

مع صبر أرباب الهمم والعزايـم

صبح الحديد شباك يلاقي حبيب

وكوبـري بيـن الضفتين مشــدود

زى الوتر ع العود

في البـرد يحكي ذكريـات النــار

صبح العرق قضبان سكك ممدود

وعجل على الوادي الأمين دوّار

وعمود ينادي عمود

طول الطريق بيونّسوا المشوار

يا سلك يا ممدود بطول النيل

بيـن البـلاد بتبلّـغ المـراسيـل

ولاّ بتنسى عشـان بقينا كتـار

يا رب صلّي وسلم ع النبي المختار

وعلى نبيك داود إمام الحدادين

اللي جعلت الحديد ما بين صوابعه يلين

وجعلته آيه فى الكتاب تجمَعنا

ولو حياتنا ليل نهار فى النار..

يـوم القيامـه حندخـل الجنــه

بإذن العليم

صبرنا ويّا الشقا.. والفجر بيشقشق

علشـان حديـد سور الجنينه يـورّق

زي الغصون ويفتح النوار

يا عزم قلبي .. ولاّ عـزم إيديّــا

يا حدادين إمتى العرق كان ميه

أنا اللي ماشي أنادي ع النايمين

بيـن الحـواري سمعـت بعينيّــا:

مقبض حديد ع الباب

وحِدوه مبريه

وإبره جُوّه الدرج مرميه

وسلسلة بحَّاره

دارت علـى كل المواني

ورجعت الحاره

ع الكوم مصديه

وسيف حزين

كان فى ميدان عابدين

مش باقي منه إلا حبة رنين

وكلمه حماسيه

وتروس قديمه نايمه وسط الخُرده

بصيت عليهم قالوا: بنشَبِّه

كنا في بيتك ساعـه ومنبه

بالطبله دقه       وبقلبى دقه

ياللى سامعنى   ما تقولش لأ

يا رب إجعل ضميري وصوتي زي بـلال

غنـوة مـحـبـه وأمـل بتـجمّــــع العمــــــال

بين الدخـان والعـرق والصهد قلنا: يا رب

هوّن علينـا الشقـا.. وارزقنـا رزق حــلال

اصحى يا نايم

رمضان كـريم