دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

****

 القلب موجوع

و الصحة معتلة

من أنظمة عيرة

فى أمة محتلة

 يا امة لا تحزنى

من بياعين أوطان

تجار يبيعوا امهم

لصهاينة و لأمريكان 

يا فجر ارفع ادانك

و اكسر بيبان السور

العتمة عدت حدودها

افتح طاقات النور 

خندقنا هوه المقاومة

يا صهاينة يا أمريكان

سكتكوا عتمة وعامية

و لكل صبح أوان

نرفع رايتنا لفوق 

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا ألف أه يا ليل

يا ألف أه يا عين 

الأوله فلسطين

و التانية وعد الله

و التالتة دم الشهيد

الأوله فلسطين يا أقصى يا قيامة

و التانية وعد الله له آيه و علامه

و التالته دم الشهيد بعزة و كرامة

 الأوله فلسطين يا أقصى يا قيامة و الطريق ممدود

و التانية وعد الله له أيه و علامة و صراع وجود لا حدود

و التالتة دم الشهيد بعزة و كرامة بالإنتصار موعود  

 مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

وحد الرزاق