تكبير الخط تصغير الخط

المليارات الي اتصرفت علي انتاج مسلسلات بتدخل كل البيوت  .. تقوم بنشر  الجهل والرذيله والبلطجه وبتشوه صوره مصر واهلها المحترمين في عيون المشاهد العربي والالفاظ البذيئة اللي بتطلع من النجوم دى واللي هنسمعها في كل شارع بعد كده .. ورجال أعمال لاما حرامية لاما تجار اثار أو مخدرات ورغم أنها  انعكاس للحقيقة إلا أن أي دراما في الدنيا بتجمل بلدها وعمرها ما بتنتقدها اد ما بتجيب الجوانب الإيجابية فيها .. ولو تم  صرف  كل تلك الأموال  في  بناء  مدارس ومعاهد لتعليم الاجيال التقنيات الحديثه والثقافه والقيم والاخلاق .. التعليم اللي بجد مش اللي بيحصل دلوقتي  .. وقتها   هيبقي عندنا جيل جديد مبدع يخرج لنا اعمال فنيه راقيه  محترمه تفيد المجتمع وتطوره  .. ونسترجع قوه مصر الناعمه من جديد  .. 

والمليارات اللي بتصرف على الاعلانات والنجوم اللي في كل اعلان ومدة الاعلان اللي  بتعدي مدة حلقة المسلسل نفسها ..  اعلانات مستفزة وبتخاطب فئة بتمثل ٤ % من الشعب في الوقت اللي بتلاقي كل الشوارع مليانة شحاتين ده غير موظفين كتير اوي عايشين بالعافية وبيكملوا شهرهم بالدين .

ياخساره يا تليفزيون فينك وفين ايامك وايام صوت القاهرة .. ليالي الحلمية .. الشهد والدموع .. رافت الهجان .. ام كلثوم و .. و.. 

كانت مدة ااقل حلقة تضاهي ال 30 حلقة من اي مسلسل دلوقتي اللي مدته لا تتجاوز 5 دقائق .. مش عارف لمصلحة مين تم قفل صوت القاهرة وقطاع الإنتاج ..  وبيتم تدمير مبنى التليفزيون وهيتم غلقه  .. واللي كل يوم عن يوم بنعرف قيمته وأن هو الأصل وان ما يتعرض له من إهمال في كل شئ  ووصوله لمرحلة أنه بيطلع في الروح الان ليس لمصلحة أحد .. ياريت الدولة تهتم بيه  وتطوره وترجعه لسابق عهده فهو يملك من الكفاءات الكثير واللي منها شايل قنوات بره رغم أنه ممكن يكونوا اقل كفاءة ممن يعمل بالتلفزيون فالعمل الخارجي بالمعارف فقط وباللى له ضهر اكيد .

 لاما يقفلوه  ويريحونا من القلق اللي عايشين فيه كل يوم اشاعات وكلام بنسمعه وحال المبنى بقى زفت ولا استوديوهات ولا كاميرات كله اشترى كاميرا خاصة يصور بيها عشان يقدر يعيش .. ووحدات مونتاج متهالكة .. وكل الأجهزة أكل عليها الزمان وشرب من سنين لم يتم تجديدها وسيارات إذاعة خارجية فقدت صلاحيتها  ..  ومكاتب وكراسي متهالكة  وحمامات غير آدمية  .. واتحرمنا من نقل كل شئ ومن اي  تغطيات خارجية  حتى المباريات في كل الالعاب .. سابوا لنا دورى الدرجة التانية في كرة القدم اللي بنصوره بإمكانيات ضعيفة جدا وقريب اوي هياخدوه مننا هو كمان ..  

ياريت ترحمونا بقى بدل القرف والقلق اللي عايشين فيه  .