وبعدين يا حبيبتي 

لا الضحكة بانت ع البيوت

ولا لحِقتْ تقرا الفاتحة ف رحاب الحسين 

ولا كلمتشي الودع

ولا شوفنا منها  البدع

ولا وزعت الورد ف الميادين 

ولا حق روءة رجع 

ولا حق نور الدين 

ولا الضالين بقي بعدها امين 

ولا كفر نافع معاها ولا توحيد

دا جواب  بعلم الوصول للقلب

مش جاي طي البريد 

افرد لي حاجة البيوت علي درجة السلم 

وارمي بياضك باللي عندك  العدرا  هتسلم

هاتشوفها رابطة الحجر 

علشان تراضي عيونك 

ترجع لها سالم 

ترجع لها غانم 

عالم ومتعلم

ولا جه بشير من يمتك 

ولا خبر علم 

اعذرني من غلبي فكيت حجاب الناس 

بسر رب الفلق وبفضل رب الناس

لا سحر قول ها ياخدهم 

ولا يافطة تبقي لباس 

ولا يبقوا تاني مداس

ولا يوزنوا بره

ولا يخرجوا لبره 

انا سيدي يملك مجرة 

فيها العيون تتباس 

وكلت فيك العزيز 

ويوسف بتأويله 

وخمسة تحت العباية

كانوا بدور ليله 

وليهم  ف شارعي علامه 

و عشاق كتير ياما

ماسكين دفوف الهجرة 

مستنين بكرة 

علشان يقولوا ف عيينه 

ساااالمه ايا .... سلامه .

من ديوان ... 

#امانة_الارجوز 

بجمعه من سنين لحد دلوقتي 

وكل ما القي ورقة منه اقول لمهاش ضرورة دلوقتي !