الاكاديمية الدولية لعلوم النفاق !!

فكره تكسب دهب..ايه رايكم نعمل اكاديمية دولية لعلوم النفاق.. عندنا معهد خدمه اجتماعيه ف قنا وغيرها..يخرج كل سنه الاف العاطلين..صاحب المعهد المحترم ده بيكسب ملايين !!

لكن اكاديميتنا..لاتقولي هارفارد ولازويل ولادياولو.. الاساتذه عندنا بالهبل ..فركة كعب ..مش حنجيب حد بعيد..محلي ..العمل للخريجين: بالدولار ..علي قفا من يشيل ..عمر ابوه ماكان يحلم بيه..لاتقولي قضاء ولاشرطة.. متفكرش..مقفولة لولاد الظنايا ..احلي  م الشرف مفيش.الشغل عندنا وبس ..دارسين احتياجات البلد!!

نقسم الاكاديمية شعب: اعلام..صحافه ..تليفزيون..قنوات  بلدنا وجيرانها ..قاعده تلم الكل ..اوعي تدعي وتقول: قبر يلم العفش كله..عيب..لا..بعدين ازعل منك ..

 عندنا كمان ..شعب علوم سياسية :احزاب سوايرس ..ابوهشيمه و...و...و..تاخد الخريج م اللفه..نغير له حتي اصله..نطلع جده سيدنا النبي اوالعشرة المبشرين بالجنة ..نديه شهادة مختومة بكده ..كله بحسابه والحسابه بتحسب..ليس بين الخيرين حساب!!

مصاريف جيب مد ايدك ..خد ..تذاكر طيران اركب ..

الله يرحم الوالد لما ركب القطر القشاش المميز..اتصور وراح للوالدة ..وراها الصورة..قالها :شوفتيني وسط الاكابر..

غير كده ممكن شهادتنا تدخلك في تكتل حب احمد موشيه.. تشوف العز كله .. اللي ماتخدش ف النواب ولا الشوري..قول له : ح نحطك ف قوائم  المحليات..ح يجالس بلوكامين المركز ..يقعد مع شيخ غفر بلدهم.. كتف بكتف .. عاوزين ايه اكتر من كده ياولاد الو.....بلد قفوات ماتستهالوش النعمة!!

 يابن عمي: نافق تهيص..وهيص تعيش..عظماء الرجال ..كانوا منافقين مثلك.. اكاديميتنا ترحب بكم ..شرفونا تجدوا مايسركم..

تيسيرا علي ابنائنا الراغبين بالالتحاق بالاكاديمية نقدم لهم اسئلة الانترفيو واجاباتها النموذجية :

إنترفيو الأكاديمية :

 _إسمك بالكامل 

عبدك ومداس رجلك ...فلان

- ليه قدمت فى الأكاديمية  

*إتعرض عليا طب وهندسة ولما عرفت إن سيادتك العميد قلت لهم هأرمى نفسى تحت القطر لو مادخلتش الأكاديمية  دى

- ليك تخيل عن المواد الدراسية فى الأكاديمية 

*معاليك اللى تقرروه علينا ماشى وأنا سامع إن المواد مطاطية ...فيه مادة إسمها مسح جوخ عملى ونظرى ...

وفيه مادة إسمها الردح على الهوا للأعداء والخصوم ودى العملى بتاعها فى الإنتاج الإعلامى 

وفيه مادة كيفية شيل ولف الحفاضات لأبناء سادتنا البهوات ...

وفيه مشروع سنوى حتى ننتقل للسنة اللى بعديها ...عن كيفية تجهيز القفا والمؤخرة لأصحاب القرارات المؤثرة....

- الف الف مبروك ...مقبول ...اللى بعده