تكبير الخط تصغير الخط

واضح إن فيه حد في الأجهزة بيحاول يلعب بملف الإعلام. أنا مش قادر احدد هو بيعمل كده ليه!!!

الحد ده أو الجهة دي بيحاولوا يحطوا الرئيس في بؤرة كل الأحداث  يعني في موضوع قاضيات مجلس الدولة، وفي مواضيع المواطنين اللي ماشيين في الشوارع، وفي مواضيع المتاحف والسكة الحديد ومترو الأنفاق والأزهر والكنيسة والكونافة. 

فيه حد عايز يعمل من الرئيس تريند يومي في قضايا المفروض إن دي من مهام "المؤسسات"، لان رئيس الدولة المفروض إنه بيشتغل حاجة تانية خالص وعنده مهام تانية خالص، و"المؤسسات" عندها شغلها ووظايفها ومهامها 

أنا خايف إن اللي بيلعب في ملف الإعلام مرة تانية وتالتة ورابعة وتاسعة يكون بيحوِّل الرئيس لمفتي أو لولي من أولياء الله الصالحين. ومش بعيد يطلع علينا بفتاوى بينسبها للرئيس أنا مندهش فعلا، هو يعني إنتوا تيجوا تكحلوها، تعموها؟! تيجوا تصلحوا حاجة، فتقوموا تطربقوا الدنيا، وتخلوا الرئيس يسيب شغله وييجي يفتي ويعك معاكوا؟! ما تسيبوه يعمل شغله اللي هم مسميينه رئيس عشانه، ويبقى فيه مؤسسات بتعمل شغلها... إيه رأيكم في الاقتراح المهبب ده؟!

آخر حاجة، واللي واضح منها إن الحد أو الجهة دول بيحولوا الرئيس لمفتي هي قضية القاضي بتاع الزمالك، اللي شغال في الكويت حاليا، واللي دلوقت هم حاجزين على شقته وعاملين 5 لجان من 5 وزارات هي الثقافة والآثار والعدل والداخلية والمالية، وضاربين حصار حوالين الشقة وكأنه حصار عكا أيام أحمد باشا الجزار... 

الأخبار شغالة، والإعلام الدولي، اللي بينقل عن وسائل إعلام العباسية، رابط القضية باسم الرئيس، وكل شوية الرئيس يوعز ويأمر ويسند ويوجه، وكأن فعلا مافيش أي مؤسسات في مصر، ومافيش حد بيتحرك في البلد إلا بأوامر وتوجيهات وإيعازات رئاسية... هي الشقة دي فيها كام مليار يعني؟! يعني مثلا ممكن يبقى فيها 25 مليار دولار ممكن نسدد بيهم ديوننا لروسيا مقابل مفاعل الضبعة؟! فيها مثلا 20 مليار يورو عشان نعوض بيهم خسائر السياحة مع مجئ السياح الروس اللي هيأكلونا شهد؟! وممكن يكون فيها 50 أو 60 مليار سترليني يعوضوا خسائر سد النهضة ونستورد بيهم مية من الإمارات أو من الصين مثلا؟!

هو فيه إيه بجد؟! إنتوا ليه فاشخين البلد كده؟!