كتب اليوم .. بحق ، الناقد القدير أسامة عبد الفتاح .. في الموضوع المثار : ( مسلسل "الملك" عن أحمس .. قائد وبطل تحرير مصر من الهكسوس). وهنا يضع ناقدنا النقط علي الحروف :

  معلش عشان أنا فهمي بطيء..

هو حضرتك هاشتاج نتفرج وبعدين نحكم ده هدفه إيه؟ وموجه لمين؟

للجمهور؟ لينا يعني؟ طب احنا نتفرج على ايه إذا كانت الشركة المنتجة وقفت مشروعها عشان تحسنه أو تجوده او عشان أي سبب هي شايفاه.. باختصار: وأنا مالي يا لمبي؟ حد بيعمل حاجة وقرر يوقف صنعها، أقوله أنا لا هاتها أتفرج عليها غصب عنك؟

طب يمكن سعادتك موجهه للشركة المنتجة نفسها؟؟ أولا: احنا مالنا برضه، ثانيا: حضرتك بتطلب منهم يفرجوك على حاجة هم مش عايزين يعملوها إزاي؟

هو أي زيطة وخلاص؟

بالمناسبة: موضوع حرية التعبير مش حياكل هنا خالص، ده مش عمل مكتمل وتم منعه، ده مشروع وتم وقفه زي عشرات المشروعات اللي بتقف.. وبعدين حضرتك يا بتاع الحريات الجامد قوي ما اتنحررتش قوي كده ليه لما أعمال كاملة وجاهزة اتمنعت زي مسلسل "أهل اسكندرية" وفيلم "آخر أيام المدينة"؟

بالمناسبة كمان: يا أهل الفن النجوم الجامدين المتضامنين، ليه مش بتتضامنوا قوي كده وتعملوا هاشتاجات عشان زمايلكم الممثلين والمؤلفين والمخرجين والتقنيين اللي مش بيشتغلوا بقالهم سنين، واللي بيعانوا من أجواء الاحتكار والشللية، وفيه منهم وصل لمرحلة الاستدانة - ومش عايز أستخدم كلمة تانية جارحة - بدل ما تتحرقوا قوي كده على نجم بيتنقل من مشروع فاشل لمشروع تاني أفشل وفيه غيره مش لاقيين مشهدين؟؟