ويقولوا السجن

لا حيطانه حرير ولا شبابيكه نحاس

وابوابه فوقيها ولا ألفين ترباس

مترين بالعافية تمد عليهم الحلم

مترين بالعافية 

مساحتهم ع الصبر مقاس

بس الضحك

الضحك يوماتي 

بتتقطع فيه الأنفاس

والجدعان واضحين المعنى

ايه تاني غير ده هيوجعنا

نومة البورش في عز البرد

تسوى في يوم

ميادين تجمعنا

أولاد الناس

اللي عيونهم زي أقمار 

مخفية 

في العتمة سنين

تسمع ضحكاتهم

لما يقول السجان مرة

دول مساجين

مساجين

ازاي

وبتضحكوا على مين

عمر السجن ما كان زنزانة

ولا أسوار عالية محاوطانا

السجن وطن

لما تكون الكلمة عشانه

في شرع القاضي وسيده خيانة

السجن 

شوارع مش محتاجة لشرح

مشتاقة لفرح

وبالخوف مليانة

السجن ميدان مسكونة دروبه بالغربان

السجن وابور بيزت جتت فوق القضبان

السجن سكوت

وأمل مكبوت

وكلام محبوس على طرف لسان

السجن بشر

من أوهامها

خلقت ليها جوه أحلامها

ميت سجان

يا حسام

بتعدي سنين السجن قوام

ما باسهلش عليك الحبسة واقولك أسهل

والله دوقتها قبلك 

طعمها حنضل

بس لكل وطن كيال

وانت الشيلة عندك اتقل

الله يعينك على حمولتها

ويعوض صبرك بالاجمل

تعرف

كل جواب باكتبه لصحابنا فيه باتوجع

قلبي يدق 

كأن فيه واحد 

عمال يخبط فيه وبيرزع

بس جوابك غير الكل

حاسه خفيف 

باكتبه وكأني معاك على أي رصيف

وبنتفرج ع الماشيين

ونقول 

هما دولا المساجين

اللي عيونهم رامية دموعها في قلب احضانهم

دولا بقى إللي خايفين

ومن خوفهم

خلقوا سجانهم

الأولة يا حسام

كتر الكلام في الحزن زي العزا بالأمر

والتانية يا حسام

عشرة رفيق السجن 

عشرة تساوي العمر

والتالتة يا حسام

مهما هتعلا حيطانك

ويكدرك سجانك

لازم هترجع مصر

رمضان بيجري

زي البواخر

ما فضلشي منه

غير الأواخر

أسبوع ويمشي

وأطفي فانوسه

وارجع ما اصومشي

وانسى دروسه

لكن طعمه 

لسه ف روحنا

آيتين حفظنا

يداووا روحنا

إنا لننصر

إنا فتحنا

الليل باقومه

سجدة وركعة

تلمس نجومه

ف عينيا دمعة

مش باقي منه

غير بس جمعة

مش باقي منه

غير صوت صحابي

اسمع أيديهم

بتدق بابي

يا رب حكمك

طامعين في كرمك

مرة تحقق

دُعا جوابي

من قدك انت

ع الخلق أرحم

رمضان كريم 

بس انت أكرم

شعر : محمود العدوي 

#الحريةلحساممؤنس 

#مصربلاسجناء_رأي

التيار الشعبي المصري