في البدء يحلا القول 

على الأرغول 

لسه الأمل مفتوح

في قلوبنا مش مقفول

واللي اتمسح من حيطة الميدان 

منقوش على الوجدان 

لا يمكن إنه يزول

السجن ما سرقش من الحيطان غير حضنها البارد

والحزن ما سرقش من قلبك إلا ضحكتين بالعافية

يا وازن الأحلام بالسجع والقافية

يا لافف الدنيا زفف وموالد

تحكي وتحكي 

ترضى وتعاند

تكتب وتكتب

وتعيش كما الزاهد

يا مشتري الأوطان بنومة الزنازين

لساتنا مش ناسيين

إنك هناك صامد

الكلام ع السجن صعب

والسكات بالغصب أصعب

والميدان لما يغيب

تلقى قلبك فجأة يتعب

تبقى توتة

واقفة وسط الحر فاردة فيه فروعها

للصحاب ضلة وسيعة

للغرابة جذع يسند

لو في يوم خاخت جذوعها

أحمد

كل كلمة كتبتها

طبطبت على ياما ناس

خففت ياما وجعها

الأولة لأحمد

من وشك المنحوت صخر الجنادل حن

والتانية لأحمد

فيه ناس يجيها الموت لا بتبكي ولا بتئن

والتالتة لأحمد

والمولى له كرامات في لحظة بيها يمن

سبع سواقي

دايرة وهايمة

من حزن باقي

والمية صايمة

ترسا في عيونك

والدمع طامية

هوارة إطسا

في القلب لسه

العشق حبسة

والشوق سجون

كوم أبو ماضي

سد اللاهون

والحزن عادي

ممكن يهون

اكتب جوابي

لناس صحابي

فيه ناس تقول

عنه أصول

وناس تقول

عنه جنون

وناس بتنسى

أصحاب ميدانها

بسكوتها تبني

ليهم سجونها

بخوفها يعلا

وتزيد حيطانها

وناس بتقعد

في الحر ياما

والشمس فوقها

كيوم قيامة

لاجل تشوف

حبيبها شوفة

وتقوله بس

مع السلامة

يا رب كرمك

على عبد قصدك

يجيني ردك

مرة بعلامة

من قدك انت

ع الخلق أرحم

رمضان كريم 

بس انت أكرم