ولد عجيب

تتصور

بنلف خيطان العمر الدايب

نتسر سب جوه حيطان الهم فرادي

ونشوف أصحابنا كفوف بتسلم

وورود دبلاته بتموت

وبتنزف في عبير الروح

والسكة خلاص ما بقتش بعيده

شبابيك ع القلب المجروح

تتصور

ما قدرنا ش

حتى نغير فكرتنا عن بكره

أو حتى نمس العرش الحاطط

رجليه فوق رقابينا

ويسد طاقات النور

ما قدرنا ش يا عصام

وقدرت أنت لوحدك

تفر

من بر الملح لبر الملكوت

وتفوت وسبقت الصوت

مخرج واحد للدنيا

مخرج واحد وبلون الدم

وسبقت بخطوه زي زمان

سبتنا في العامية الدبلانه الباهتة

وعديت بقصيده النثر

رصيت كل كلامنا

ورسمته حواديت

فتنا لآلامنا في بكره وعديت

قبل ما يهل علينا الموت الجارح

ما عرفناش يومنا من امبارح

كنا مطرح ما يهل علينا اليوم بنبوح

ونقول الشعر ف حواديت

للأمل الصابح

للضحك

للغدرالبايت

لوشوش الناس والنيل

أو حتي لضفاير بنت نسايه

ورموش من تيل

لكن وشك لما يهل علينا

بالفرح الطالل منه كما الأطفال

والنظر ه الشوق لعيال

والحلم الضامم بكره بكل جوانحه

ولامم كل عيال الحارة حواليه

كنا نشيب من قوه صبرك

من جلدك

من جدك وقدره جسمك

 علي شيل الأحمال

علي قول الموال

سبتنا كده يا عصام

بكل بساطه شعرك

 والدهشة

بكلمه حب وهمسه وضحك

كنت بتلم بكف أيديك الناعمة أوهامنا

وتسجل في دفاتر أشعارك أسرارنا

تفضحنا وتفضح حوا ديتنا

وتقول

والقول من شعرك بواح

وتقول الفكر في شعرك فضاح

عن كل خطايا الفهم

واللمه والهمة 

واللقمة المشحونة جراح

وكلام الشعر الموزون أوجاع 

والنغمة في قلب الشعر ما بتهمكش 

كان كل الهم كلام يتقال للناس 

فتحسه وتحسه الناس

وتمسه وتلمس بيه علي أوجاعهم

فتحل العقدة المربوطة في دماغهم

فتطير عصافير الهم 

المربوطة علي أصداغهم

ويفكو الحبل المربوط في رجولهم 

تتنطط كل خيولهم قدامهم 

جاهزين للغزو خلاص يا عصام 

وأنت سابقنا بخطوه كبيرة طويلة 

بتلم القعدة علي القهوة 

وكراسي العمر الدوارة حوالينا

جهات اربع 

وأنت جهة واحده دايما للخير 

واستغربتا أزاي هتفوتنا

 ف عز ما جاي موعدنا 

أزاي بتسيبنا كده ل ربيع النساي 

بيضا جع مر الأحلام المبتورة 

لوحده في اسطنها 

ومركب حب يغرقها بأيده 

و بيكتب لحن مانفهمهوش

ولانسمعهوش

 و يصلي على فرسه المرمر 

و بيعشق في الخيال مرفت

 ومايجيبهاش 

تلم الغلة ويانا

 في جرن الكفر

او في اسطنها ع السكة 

تعرف دي تاني جايزه بينولها عزب في البغض 

بيكتب مر إشعاره عن الحواديت

محمد طه خد إدريس في الركض 

وعكاشة بينحت في الجايزه التالته 

من إشكال نحته العابس زيه 

انا عارف انك شايف دلوقتي 

الروح بتشوف

شايف الصادق م الكداب

بس الآهة يابو حجاج 

لوواحد كان زعلان منك

 دلوقتي تصفح عنه بكل مودة 

وتمد ف حبل الأدب الواصل ليك 

من أحلامنا وهمومنا وامانينا 

فازاي هتفوتنا كده  

من غير ما تلم كلامنا المتبعتر تعمله أشعار

وابو عامر هيفسر هولنا في قصه جديده 

وازاي هتقوتنا كده من حتي ما تدهشنا 

انت دهشت عصام

 كان ماشي في جنازتك مش عارف مت ازاي 

نسيته الطب اللي درسه

 نسيته العلم اللي في راسه 

حتي موتك اغرب دهشه 

شلت كل ايادي الخلق في بنها 

مين تاني هيوصف في الرياح التوفيقي 

وكوبري المنشيه ومساكن طابا

والبنت اللي لقوها مرميه تحت الجسر 

برقبتها المقطوعه 

احتاروا ساعتها في التفسير وعرفت انت

مين تاني يلف سجاير البانجو في شعر 

ما تمسكهوش امن الدوله وتصادره

مين تاني هيطرد خوف الناس م الضلمه 

مين تاني هيرفع جوه الكفر اذان 

ويصلي العصر ف طحله

 والمغرب في البستان 

او علي قهوه صابر في الشديه 

مين تاني هيقدر يقعد

ورا قصر ثقافه بنها

ويزعق ع المشاريب 

مين تاني هيجبرنا بادبه الحالم 

نقرا لعبد الباسط

يادوب تلحق"”

او نسمع هاني عمر 

او نقرا الحس المرهف 

والمعني التاني في شعر الحلواني 

ونبص بعينه ع الدنيا من شباك ف بنايه

 ل فؤاد مرسي

او نسمح ل سنين الرمل تاخد نا مع درويش 

ونحب سهيل ابنه .

ونحط عياطه في الحواديت 

ونشوف الفكره الواضحه في شعر رفاعي 

وندوق فتافيت مسعود

مين تاني يحس ألام الناس الموجوعة بلقمه عيش 

مين هيلم الشله بهمه 

ويفسر لابو الدهب الغيبيات 

ويطارد نومته ف قلب الحيطة

ويعدي معاه للبر التاني 

مين هيصالح عبد الواحد 

ع الدنيا الحرنانه

ويعدي معاه

لعبير الروح 

لبنات الجن الموصوفه في اشعاره 

لكلامه المليان احلام

دلوقتي شايفنا بدهشه زي زمان

اللوحه الاولي  لهشام

مع اول حبايه مانجه نسرقها 

من شجر الباشا ف كفر منافر

دلوقتي شجر الجنه مليان 

لاغفير هيطارد بعصايته 

ولا حتي يلسوعنا

 بجريد النخل ساعات 

ولا ضربه في راسنا تطوح مراكبنا

 واحنا بحدف بالطوب

 علي زلع العسل المليانه سرور 

استحرم يومها الراجل يضربنا

 لما بكينا انا وانت

 ولأنه زي الخلق

 وحاسس بينا وبفقر الاهل الواضح

 في هدومنا الكستور

 ورجعنا نتسابق ويا شريط القطر

 عيال بتشغبط اهازيج للفرح 

لحد القطر ما داس علي رجل الكومي 

وكرهنا القطر وكرهنا محطه بنها الكدابه 

بتبص علينا وع القطر وعلي قهوه صابر 

وبتضحك

والدمع ف قلب كفوفنا رمال

خلاص يا عصام

ساينا لبكره نخبط كف بكف 

نتعجب

علي قد قلوبنا ما عشقت أشعارك أفكارك 

مش ممكن ننسي الوش الصابح

زي العيش الصابح

من فرن الشيمي زمان

دلوقتي العيش محبوس في الكيس 

وشوارع كفر مناقر نسيت الاقفاص

بتلم خطاوي حزينه

تستني الصبح هيطرح مطرح للناس

والجوع النهاش 

مرمي في بطون الأطفال 

وايديك ويانا تلم الدمع من الطوابير

فكرت ازاي تعملها وتسافر وحدك 

واحنا علي رجلينا وراك ماشيين 

حسستنا بالعجز

كنت هتكتب عني لو مت 

محمد افكاره بتكتب اشعاره

حاطط ناصر جوه البرواز

بيحلم للناس بالا جره 

ويضايقه غلو الجاز

كنت هتكتب ايه يا عصام

طبعا كنت تدهشنا بكلامك

يا ريتني سبقتك

او خبيت قلبك في قلوب الناس 

خبيتك م الموت

بس اوعد روحك

ان كلامك يفضل عايش

 جوه قلوب الناس 

الفقرا ايوه الفقرا يا ابو حجاج

مش جوه قصور الظالم

انا عارف ان مالكش في البرفان 

ولا صور العاج المتلزق بالالماظ

انا شايفك في صواني الاكل مع العمال 

بالقصعه علي سلم بكره

بتبني للحب اساس 

طوبه في جدار الحب في مصر 

حلم اخضر وبلون الطمي ساعات 

حلم الطمي اللي اتغرب في الدلتا 

شايفك وبطول الرياح التوفيقي

بترسم احلام لولاد الناس 

وعيال بكره وعيال لسه ما سميتهاش

عارفك

كل حكايتك دهشه

شايفك جوه كتاب الجبر 

وسلامه بيرص الحواديت 

عيل شبطان في حيطان الشمس 

فاتح شبابيك الفقرا لبكره 

وعكاشه نحتك في الاصداء

حسن حلمي

 رسمك في مقام الاندهاش 

ولا سراج 

لما خرج من طحله لروما خدك وياه

شايفك بترص الأشعار في ديوانه

وبتضحك علي نكته البايخه

وهو بيحضن شنطه سفره 

وماشي يقول اشعار 

"حتي إمام "

سجل لمحك في سطور شعره 

وهو ما يدرا ش 

" هو الذي سكبت يداه الصحو" 

ايوه ايديك يا عصام 

انت المطلوق احنا المحابيس 

حسستنا بالغربه في بعدك

وضمر بيقول 

ما كانش ضروري تعيط "

لجل يبان الحزن عليك

او حتي رموشنا ترف" 

تتصور جوه كلامنا كل كلامك 

وكلامك هو كلامنا زي ماهو 

نفش الدهشة 

لسانا بنقعد نستنا ورودك ع القهوه 

زي النفس الطالع من صدر الزهئان 

وتهل علينا بأحلامك زي الأسفار 

وتلف علينا بهمه وتسال 

وتمد ايديك لسنين العمر

 الدايخه تداوي جراجنا 

وتجيب لجروحنا ورق من شجر الجنه 

وتحط التوت علي عوراتنا 

وتداري في توهه احزانا 

دلوقتي محدش بيطاردك في الليل 

لا الموت ولا ضل الأشباح

شفت البت نعيمه المقتوله 

شفت أخوك يا عصام

لساك بتحط اللقمة في بق الناس 

والجوع واكل بطنك 

لساك انسان يا ابو قلب ملاك

عديت كل الافلاك

بصيت واتسعت بيك الرؤيا 

بتشوفنا 

شايف خطاوينا ازاي بتوه

مين غيرك يرشد خطاوينا ويرشدنا 

ويحط للشعر دليل

امال نكتب وخلاص

علي قد ما بعدت منا المسافات 

علي قد ما ضاقت بينا الحكايات

شايفينك

في حروف عزب المجنونه 

لساه بيضرب في الهوي العكاز

" ياعم روح وسع بقي ايوه انت 

وانت بتسمع شعره وبتفرك ايديك 

وتقوله يدخل في السباق 

يركب حصان معدول مش كرسي بعجل 

حتي مرفت يا عصام 

وانت عارف قلبها بستان وبيساع الجميع 

فاتحاه مطارح للبكا وللعيال المحرومين 

وهيه اطيب من نبي وعفيه في وش الزمن 

صامده مع كل المحن بلسم دوا للمجروحين 

دلوقتي بعدك هزها 

فجر دموعها لاجل ابوها وامها 

ف ازاي هنا عليك تجرح قلبنا

 ازاي تسيب الخوف يعشش في القلوع

سلامه لساه في بتمده بيمتحن صبر الزمن

 في العيال المجروحين 

من فراق الاخ لفراق المحن

مستني يرصد في القصص 

لون الخطا وحلاوه الاناشيد

عابدين مع العرافه في رحله سفر 

بيفسر البعد المفاجئ للقصيده

ومنال فاروق في الجانب الاخر 

كتبت صعودك في الصعود

يا منال 

عصام بروحه كان صعد

 قبل ما يدور القمر في الحي 

او حتي نلم الاسئله 

وقت الاجابات انتهي لا بالدموع ولا بالنواح

احنا هنكتب ع الحواري قصتك

عيل بلون الطمي شبه السنبله

واقف بينحت في الصخور

وكمان هنكتب ملمحك

نتلم في الصحبه 

ونفترق 

حواديت وقلمك رصها 

حواديت قلتها في شعرك عشانا

زي النور هتسهر في سهرنا 

ونبص معاك للجاي من طاقه النور 

من خرم في طاقه حيط

نلضم احلام ونفسر كل كلامنا لبعض 

ونعدي لبكره معاك 

تسبقنا ونلحق 

وهنكتب كل قصايد الوطن المر

 بطول الوطن المغتال 

نفتل احلامك ضي سلب وحبال 

ونهد سدود الحزن بهمه 

ونقول لولادنا حواديتك

وازاي صحيت الناس 

بجرس وناس 

بيدق في كل حكاوي حكايتك 

مش بس وداع واحد ياعصام  

وداعات 

الطفل المعجزة مات