عزيزي السلفي . عزيزي الاخواني . عزيزي الصوفي . عزيزي المسيحي 

انا مش مختلف معاك فيما تعتقد . ومعنديش مشكلة ان كل واحد فيكم يبقي شايف وعارف ومتاكد ان طريقته ومذهبه هو الصح وهوه ده الطريق الصحيح للجنة . وأنك الوحيد اللي فاهم كويس ربنا قال ايه ويقصد ايه بالعدل والحق والباطل والمساواة  والظلم والقهر والقتل والجهاد والفرض الواجب وفرض الكفاية .. وانك الوحيد اللي تقدر تقولنا المرأة تلبس ايه وتمشي ازاي وتشتغل ايه ومتشتغلش ايه وتاكل ايه وتشرب ايه وتنام ازاي 

وأنك الوحيد علي هذا الكوكب اللي فاهم وعارف ربنا قال كده ليه ويقصد ايه بكلامه 

انا معنديش مشكلة اطلاقا تحب الشيخ فلان أو القس فلان وتكره الشيخ أو القس فلان اطلاقا . ومعنديش كمان مشكلة تربي دقنك وتحلق شنبك او تربي دقنك وشنبك مع بعض أو تحلقهم الاتنين 

معنديش مشكلة خالص انك تلبس جلباب ابيض أو أسود او احمر أو اصفر أو أخضر اطلاقا 

ومعنديش اي اعتراض اطلاقا انك تشرب بيرة او حشيش او حتي بول البعير . طالما انت شايف ان معتقدك بيقول ان ده صح 

أنا مشكلتي معاكم كلكم في حاجة واحدة 

طول مانتو بتكرهوا بعض وبتتخانقوا وتقطعوا هدوم بعض وتكفروا بعض وتدخلوا بعض الجنه والنار حسب هواكم وتطلعوا ديك بعض .. فالوطن ضايع لامحالة وربما يكون ضاع بالفعل 

سالت نفسي مرات كثيرة 

هوه ليه احنا الشعب الوحيد اللي اتكتب عليه الفقر والعبودية ؟ 

ولقيت الاجابة ربما تكون حقيقة 

اتكتب علينا الفقر عشان بقالنا ٧٠٠٠ سنة بيحكمنا فرعون واحد واحنا عاملين زي النحل الدكر اللي ملوش فايدة غير الزن ( هذا سلفي وهذا اخواني وهذا درويش وهذا مسيحي وهذا علماني وهذا علي حق وهذا علي باطل وهذا داخل الجنة وهذا داخل النار ) والفرعون باصص علينا من ورا السور . كلما نامت الفتنة ايقظها من خلال شوية عيال وسخة بيتاجرو بالدين من اجل تعويض عقد النقص بداخلهم حتي يبقي هو علي كرسيه 

اتكتب علينا العبودية عشان كلنا اغبية ولم نفهم رسالات السماء 

التي جاءت لنشر المحبة والعدل والوقوف صفا واحدا امام اي لص يحاول سرقة حق من حقوق غيره . لان الاله لايحب الفساد 

البس واشرب وصلي واعبد ربك بينك وبين ربك زي ماانت شايف ومقتنع . 

لكن فيه دستور مشترك بين الانسانية ربنا وضعه في كل كتاب وفي كل رسالة اسمه " الانسانية "  ( حقوق الانسان ) 

الانسانية هي مفتاح تقدم اي أمة 

عشان تعيش بني ادم كريم وعزيز وحر في اي وطن عليك بهذا الدستور  ، واذا سقط الدستور فلن تفيد القوانين 

لاتكذب ... لاتسرق.... لاتقتل 

اغرس شجرة في كل أرض حتي وان لم تعلم من سيأكل ثمارها