الرمضنة التامنة

فيه ناس تحرر في الوطن ملايين

وناس بتفتح في الوطن زنازين

وناس تهاجر

زي الطيور بالغصب

وناس بتقعد فوق كتاف الشعب

سنين وراها سنين

ضغطة ايديك في السلام

بتقرب المسافات

وسكوتك المليان بمعناة الكلام

بيجمل الحكايات

قاعد وجانبي زياد

والشاي على المظبوط

في عينيك خريطة وطن

مالهاش حدود للعشق

ولا حتى ليها شروط

تضحك

وتمد قلبك ستاير لونها في لون الحليب

وتحكي عن ميادين

لسه غناها قريب

وتقولي لو فيه عدل

كان الدعا بيجيب

ولا كان الأمل انقتل

ولا الميدان انقفل

ولا قلوب الولاد

م الحزن طالها الشيب

الأولة القصاص

النومة ع الأسفلت

ليها تمن مدفوع

والتانية القصاص

لا تعبت يوم ولا قولت

ليه الأمل مقطوع

والتالتة القصاص

والسكة زي ما شوفت

لازم آخرها رجوع

الليل رماني

في بحر عاصف

من الأماني

وسابني أجازف

لميت قلوعي

ورخيت دموعي

ودعيت يا خالق

الخلق اسف

اسف حقيقي

لاني خايف

اخسر رفيقي

العتمة طالت

والشيلة مالت

جريت لبيتنا

اجيب فانوسي

فيه ناس تقولك

ده أصل كافر

وناس تقولك

اصله مجوسي

لا كنت فالح

أحفظ دروسي

ولا كنت ناجح

في الحسبة ديه

أنا كنت اعاوز

اروح لجامعة

واجيب شهادة

في الإنسانية

نجحت رابعة

عديت لخامسة

نجحت خامسة

قالولي لسه

ارجع وذاكر

في الفقر حصة

او جيب تذاكر

في قطر موت

او ابقى شاطر

كده بالسكوت

قريت ياسين

ع الظالمين

يارب طلع

كل سجين

يارب هون

دايما عليهم

وخلي نورك

يضوي عينيهم

من قدك انت

ع الخلق أرحم

رمضان كريم

بس انت أكرم