تعالوا نتكلم شويه عن اللهجه الصعيديه المعرضه للانقراض..

 نتيجه الاعلام السئ  والتقليد الاعمي لوجه بحري..اللهجه هوية البلد وبصمتها وتاريخها وسر حضارتها..نغفر لابنائنا المقيمين شمالا نتيجة الاحتكاك المباشر ..

لكن المرزوعين هنا امثالنا..اه..افتكر في منتصف الستينات..ناظر مدرسة قنا الثانويه..المرحوم سيد علي حامد ..

قنا الثانويه.. الوحيده ومعها مدرسه تانيه في بهجوره ..علي مستوي محافظه قنا..مفيش غيرها..تخرج منها كل الاجيال..

قنا الثانويه المبنيه علي مساحة ٣٥ فدان كامله تبرعت بها عائلة عبيد باشا المسيحيه لتعليمنا يابتوع الفتنه الطائفيه ياقللات الادب ياسفله..

فكرتوني مش بس ارض الثانويه..لا كمان ارض نادي البحر ف قنا ٣٥ فدان لناس عبيد ..كان مفروض  يعملوا عليها المدرسه الثانوي فاعترض البعض علي الموقع ..

مش معقول نودي عيالنا الحميدات ومشاكل.. ف ناس عبيد اتبرعوا بالموقعين وباقي البلد ..

ساهمت في بناء المدرسه علي احدث طراز زي  المدرسه العسكريه الايطاليه اللي كان بيتعلم فيها جلالة الملك فؤاد في روما...

نرجع لموضوعنا..سيد علي حامد واللهجه الصعيديه..كان المرحوم يتمشي في المدرسه ..

ووراه عم صادق الفراش الاشهر في قنا الثانويه شايل حزمة فروع شجر وجريد نخل وعصي خرزان من اللي يحبها قلبك..

تتكسر حزمه تكون اختها جاهزه والمركوب اذا لزم تدخل الاسلحه الحديثه..علي فكره ..

المرحوم سيد علي حامد هو المعلم الاول لابناء الملك عبد العزيز وكان لايامن احد عليهم الاه..

وبنفس الطريقه دي علم اولاد عبد العزيز كلهم  ..تعالي ياوزير التعليم يابتاع التربيه الحديثه..

لو شافك سيد علي حامد كان لامؤاخذه شخرلك..خلتونا ننج ونبعد بعيد بعيد علي راي ورده الجزائريه..

عمنا الناظر  مشغلنا شرطه مدرسيه..نجيب العيال المتاخرين واللي بينطوا السور من  الباب الخلفي المفتوح علي شارع عمارة المرور القديم..

الساعه ٨ الصبح بعد طابور الصباح بالزي العسكري للطلبه  يدير الطابور النقيب الجعباص مدرس التربيه العسكريه والشاويش محمود مدرب الاسلحه فك وتركيب..

واشهر شاويش طالب  ا.د هاشم  رشوان ..طابور الصباح  حدوته مصريه..نشيد الصباح الله اكبر فوق كيد المعتدي..

تفتيش علي الشعر والاظافر والاحذيه ودهان القايش والجتر بالجير الابيض..

لمن لايعرف القايش هو الحزام العسكري والجتر هو طبقة عريضه سميكه  تقفز اوتربط بها مافوق الحذاء العسكري.. تحية العلم من حديد ..

اساتذتنا.. زاهر مشرقي المخترع العظيم..وعزت قليد الطيب..راهب العلم ..تاوضروس ..عبقري اللغه الانجليزيه..

كان في مدرس اول رياضيات..اسمه حنا..عنده ازمه ربويه..الطباشير ..في الحصه التالته ولا الرابعه.. يعمله اغماء..يغمي عليه ..

تيجي الاسعاف تشيله..وهم رافعينه ع النقاله .. بالاشاره يقول..تيجوا بكره.. الساعه سته ونص الصبح..اعوض لكم الحصه دي..

طبعا احنا طلبه سفله وواطيين..نمشي ورا الاسعاف نزعق ..يارب تموت ياحنا..علشان مايجييش بكره ويدينا حصه بدل اللي تعب فيها ..

وبكره الصبح الساعه سته..يكون حنا..جوه الفصل لوحده منتظر الطلبه..نشيط ..بيكتب عناصر الدرس ع السبوره قبل مايتعب..

ناس حلوه بجد..الظاهر خرفت وبدخل ف موضوع اخش في غيره ..المهم جبنا العيال المتاخرين عن الطابورّ.

وبيشوفهم المرحوم سيد حامد ..ويسالهم عن سبب التاخير ..عيل كلامه طري وبيتكلم بحري..منين ياض..

من الحصوايه يافندي..ابوك بيشتغل ايه..مئاول ..ايه بيشتغل ..سمعني ياحمار انت..بيقولك مئاول..متربي  بحري..

ياضّ. لا ..الوالده من بحري ىمكن...لا..امال المرض ده جاك منين..باتفرج ع السيما ..اشوف تلفزيون..امك منين ..م المعني..

ابوك ..لابوامك..لابو...كل البلاد..مبولة البلاد..ثم ينادي علينا..دخلوا كل المتاخرين..سيبولي ابن المئاول..

ابوه علي ابو كل المئاولين..ياصادق..شيل العصي..استني ابن  المئاول ماينفعش معاه الا المركوب وبس.

ويقلع عمنا المركوب ماادراك مامركوب سيد حامد...طبعا خبطه من مركوب سيد علي حامد..

تعمل. تربنه وتنزل البواسير عدل..الموضوع طول شويه..وبكره احكيلكم عن اللهجه الصعيديه الفصحي للمرحومه ستي ام امي..

جميله احمد حمادي..استاذة البلاغه وطولة اللسان جامعة العويضات مركز قفط...تصبحوا علي خير..