دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

**

 يا شهيد يا نور القدس

يا قلب عامر بالإيمان

يا اقوى من كل الجيوش

و أطهر من كل العروش

محسبتهاش بالقلم

حسبتها بالضمير

و بروح

واصلة السما بالأرض

يا شهيد يا سنة و فرض

المجد للأبطال

رافعين رايات النضال

فى كل شارع و حى

يا شهيد يا أجمل ضى

يا شهيد يا صاحى و حى

شاهد على أنظمة

خاينة و عميلة ومجرمة

وراكعة للأعداء

أصل البلاء و الداء

المجد للشهداء

المجد للشهداء 

رافعين رايتنا لفوق 

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا ألف أه يا ليل

يا ألف أه يا عين 

 م القدس جرس القيامة

ينده على الاقصى

بأس الرجال الشديد

من البطل للشهيد

عارف بان الحديد

ما يفله الا الحديد

ايام و بتعدى

و الاسر مش دايم

كل استجابة لتحدى

يا صاحى مش نايم

مكتوب على بواباتك

انت اللى دايما مقاوم 

 و مهما زاد العناد

لكل فجر معاد

 مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

وحد الرزاق