دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

---------------

 أنا الواعى و أنا المخدوع

أنا اللى فى حزنكم حاضر

وفى الأفراح أنا الغايب

وأنا فى الضرب بتحاصر

وفى القسمة مليش نايب

أنا الغالب و أنا المغلوب

وأنا فى الصبر ميت ايوب

أنا العاشق وكلى ذنوب

و قلبى فى التراب مصبوب

فى عز الأزمة بتصدر

وفى العادى أنا المنهوب

وأنا دمى فى كل حروب

ومهربشى من المكتوب

و بعد النصر أنا المسلوب

أنا سيفكم و أنا السياف

وأنا المقتول أنا و مسرور

أنا الاشياء و نواقيضها

وأنا اللى بنيت جدار بيتها

و عمرى فى يوم ما هديتها

وأنا الميت فى أنقاضها

و سابح فى بحورها و أطير

وأنا اللى فى هواها أسير

وفى الشده وفداها أسير

و عمرى فى يوم

ما كنت أمير

ودايما بدفع الفواتير

أعيش الفرحة من غلبى

و متعلق فى قشاية

و أملى فى صبحى و عشايا

أعيش مستور

و لما تبان لى زقازيقها

أرجع تانى ألف و أدور

و أحد الحد ساعة الجد

و أخرج ف الميدان و أثور

و أرفع رايتنا لفوق

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

 لكن النهار جوال

يا ألف آه يا عين

يا آلف آه يا ليل

الشعب لسه حى

رايح جى

صابر و يتأمل و يفرز

اللى باعوا 

و اللى خانوا

و اللى بإرادته استهانوا

اللى حادوا

و اللى عادوا

و اللى بفسادهم تمادوا

بكرة يطلع من جديد

عارف طريقه 

قبل ما يحدد معاده

و مهما زاد العناد

لكل فجر معاد

مسحراتى بطول البلاد

أصرخ ليلاتى

إصحوا و فوقوا

لكل آتى

رمضان كريم

شهر و عظيم

فيه العظات و المعجزات و الإنتصار

الفجر لازم يولد نهار

و الصبح مولود من نور و نار

مسحراتى و فى إنتظار

الأمة ترفع راية إنتصار

رمضان كريم 

يا نايم إصحى

وحد الرزاق