مسحراتى

بصرخ ليلاتى

على طبلة صوتها

آنين ناياتى

أصحوا و فوقوا

لكل آتى

أوجاعنا جارحة

و دموعنا سارحة

أوضاعنا شارحة

من غير ما هاتى

*

ما اجمل الشهداء

ما اروعك يا سناء

يا زينة الأمة

و نبضها و ضميرها

يا صوت عنادها

وولادها

وعشاقها

و حاميينها

فى كل ارض و سماء

وداءها فيكى دواء

درسك بليغ يا سناء

مهما يكون العدو جبار

مهما تكون الأنظمة

متلطخة بالعار

مهما تكون العتمة

معششة فى الديار

فانتى الطريق للنهار

روحك علامة للمقاومة و الفداء

روحك طريق الأنبياء

سكة الشهداء

و عهد كل المخلصين و الأوفياء

و كرامة الأولياء

و عزة الأوطان

ما اروعك

يا عروسة جنوب لبنان

ما اروعك يا سناء

يا زينة الشهداء

**

مسحراتى الغضب

و الاحتجاج

و الشوق

الجدر مادد لفوق

بحلم بفك الطوق

من ليل غميق لشروق

والصوت يشق الحلوق

يا أمة الشهداء

أمتى الجراح تتلم

أمتى يغور الهم

ما نشوفش فيكى عدو

و لا عميل و لا غم

و لا طوفان الدم

امتى نشوف طلتك يا سناء

م النيل للفرات لسيناء

تنادى بالعربى

الدرب دا دربى

دقاته صوت قلبى

و انينه بيهزنى

لما يقول عربى

وحدة لسانا علامة

وحدة مصيرنا سلامة

وحدة تاريخنا جذور

على طريق الكرامة

سناء محيدلى حروف

مكتوبة من نورها

منسوجه من نولها

مروية من قولها

هنقولها يا عشاق

ما اروعك يا سناء

يا زينة الشهداء

يا عايشة فى قلب

البنات و الولاد

و مهما طال البعاد

مسحراتى بطول البلاد

اصرخ ليلاتى

اصحوا و فوقوا

لكل آتى

رمضان كريم

شهروعظيم

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى

و فى انتظار

الأمة ترفع

راية انتصار

رمضان كريم

يا نايم اصحى

وحد الرزاق