تكبير الخط تصغير الخط

بنموت تحت القطر ع القضبان
ع الطرق السريعه

فى البيوت الواقعه
على سراير مستشفيات
الطبيب قبل المريض
بنموت
م الاغانى العاطفيه
والاغانى اللى بنهتف فيها للارض الخراب
بنموت
وبنودع صحابنا
كل يوم صاحب جديد
ماعرفش مين فينا السعيد
اللى ودعناه وبكينا
ولا اللى لسه باقى ساير فوق دروبها
بيكعبل فوق ترابها
كل خطوه سايبه ع الرمل
بقعه دم تكبر
كل ماتخطيها
تكبر
تبقى بحر
بص فى مرايتك
كل وشك دم
وفوق ايديك
حتى لما قلعت فى الضلمه هدومك
كنت متغطى بدم
بنموت
واحنا فى صوان العزا
واحنا بنصلى صلاه الغائبين
واحنا تايهيين
وبندور على قبله
وحضن
واحنا خايفيين
م التراب
وخايفين م الهوا والصهد
والضحكه اللى نامت ع الشفايف
زى قاتل
من غير ملامح
بيتفسح فى شارعنا القديم
بنموت