عشان الناس اللي ماعندهاش فكرة، ليه احنا -اهالي المعتقلين- بتبقى تقيلة علينا دخلة الاعياد ومش بنستحمل ان حد يعيد علينا -رغم اننا ممكن نهني اللي معيدين - مش بس عشان أعيادنا مؤجلة، ومش عايزين نصدق ولا نقتنع ان فيه عيد والغاليين مش معانا، وبتبقى أي تهنئة فعلا موجعة!!
لكن عشان فيه حاجة تاني بتوجع قوي، يمكن الناس مش واخدة بالها منها: أعياد يعني اجازات رسمية،

يعني معظم موظفي السجن اجازة، يعني حبايبنا بيتقفل عليهم ابواب الزنازين والعنابر تماما، 

وما يشموش اي هوا لغاية المناسبة ما تخلص ويرجع الموظفين!!..

 يعني لو حد فيهم تعب فجأة واحتاج مساعدة لازم زمايله في الزنزانة يقعدوا يصرخوا ويخبطوا على باب الزنزانة!! والزنازين اللي جنبهم تسمع،

 ويقعدوا يخبطوا لغاية ما يسمع الحارس النوبانجي وييجي يستطلع الخبر وبعدين يروح يبلغ الضابط النوبتحي اللي يبعت يستأذن رؤساءه انه ينقل المريض، 

لاسعافه!! او يستدعي طبيب ويعمل محضر بفتح باب الزنزانة وبعدين يقرر الطبيب ان فيه احتياج للنقل لمستشفى واللا لأ، 

وبعدها يطلبوا عربية اسعاف تنقله واتعمل اجراءات وورق وختم وتصريح وترتيبات !!! متخيلين ممكن يكون مر وقت قد ايه؟ وده معناه ايه لحد مريض او في حالة حرجة لا قدر الله؟
بالمناسبة بقى، السجون اجازة من بكره الخميس ٢٩ ابريل لغاية التلات ٤ مايو
بكره اجازة عيد سينا والجمعة الاجازة الاسبوعية، والسبت عيد العمال، والاحد عيد القيامة،

 والاتنين شم النسيم!! طبعا كل سنة وكل الطيبين بخير، لكن احنا مش بخير ابدا، عارفين ليه؟ لان اولادنا لو خرجوا ساعة تريض النهارده،

 حبتقفل عليهم ابواب الزنازين تماما من النهارده ومش حيشموا هوا لغاية التلات الجاي !!
عرفتوا احنا ليه مش بخير؟ لاننا بنبقى قاعدين حاطين ايدينا على قلوبنا لغاية ما تعدي اجازة الأعياد!!
دعواتكم ربنا يهون عليهم وماحدش فيهم يحتاج مساعدة عاجلة لغاية ما يعدي اسبوع الاعياد