كلمتين ع الماشي بمناسبة امتحانات الثانوية العامة.. 

من خلال خبرتي: كمواطن مصري ..ولي أمر قديم ..موظف سابق مركون ع الرف..ممكن احكي..

زمان شفت صبي فقير(ينتمي لمن يسمونهم غجر اوحلب) .. عشر سنوات ..تدرب في مركز شباب مجاور لمسكنه.. حصل علي الحزام الاسود في الكاراتية في عمره الصغير ..

بعد سنوات: رايته سارح بصندوق ورنيش في وسط المدينة..

دخلت مرة مدرسة ..عقب حوار ساخن مع معلم فاضل ..ليثبت لي .ان بعض التلاميذ اغبيا..لايستحقون اي فرصة للتعليم..احضر من فصله ٣ تلاميذ:

الاول: تلميذ في تانية ابتدائي..قال : اضربه عمره مايحس..لدرجة ان صديقي المدرس.. يضربه بوكس في وشه..يرد عليه الولد .. الضربه بخده ..ايد المدرس توجعه.والولد ولا هنا !!

طبعا ده مشروع مصارع كبير.. بعد سنوات شوفته ومعرفتوش.. 

رايته في مستشفي الحميات ..مرحلة متأخرة  فشل كبدي..

التلميذ التاني:  تلميذ خجول نحيل متهافت.. عندما سمعته عرفت: المذكور ضمن كورال الكنيسة ..صوته  ملائكي عذب ( تذكرت بدايات مطربتنا العظيمة فيروز وعبدالحليم حافظ )

التالت: ولد شقي.. عفريت..ابن جنية..لو كان لدينا جهات تتولي اكتشاف المواهب الفنية.. مشروع فنان..كوميديان كبير يعيد لمصر ريادتها الفنية !! 

 كل تلميذ عندنا مشروع عبقرية مكبوته ..رياضية.. فنية .. أدبية او مهنية..

 المصيبة: مابنشوفش غير الذكاء التلقيني والحفظ..الطالب اللي بيحصل علي مجموع ١٠٠% او اكتر..يعني صمام ..تستوي لديه مادة الكيميا مع العربي وغيره ..نعتبره متفوق!!..بينما يجب ضمه لفريق وحزب : "اربط الحمار مطرح مايقول صاحبه" ..ايداعه مستشفي امراض عقلية لعلاجه من ادمان الصم ..لو كنا بنفهم..

لو المرحوم سيبوية واضع قواعد اللغة العربية تم اختباره في مادة اللغة العربية لن يحصل علي الدرجات النهائية  .. سيحصل عليها في النحو لكن ربما في التعبير والبلاغة ح يكون زفت زي حالاتي !!

اكيد في دول متقدمة لديها نظم تعليمية مختلفة تكتشف المواهب ..توظفها..مش عيب نستورد تجاربهم ..انظمتهم التعليمية ..

الخلاصة: التعليم في بلادنا مقبرة للموهوبين !!

سمعت العام الماضي: طالب متفوق عرضت عليه فرصة لاستكمال تعليمه بالخارج  ورفض السفر ..غلطان من ساسه لرأسه..سافر يابني....سافر..قبل ماالقطر يدوسك !!

ياوزارة التربية التعليم : يجب ان تسبق التربية..التعليم..لو كانت لديكم الارادة الحقيقية لاصلاح التعليم والنهوض بالتعليم..

اخيرا: نظرة ومدد ياست الناظرة !!