صوت السواقي لما سكت اتجرأت غربان

سمعنا صوتها بينعق ويسب في الجدعان

انت اللي وجعك من النايات عزفوه

وانت اللي دمعك على الخلايق هان

واسأل ما ييجي رد

إزاي يكون ما بين عيونك والسما فيه سد

إزاي يكون على باب صلاتك بيوقفوا سجان

الأرض بور وفؤادة بتلم الوجع م الأرض

عطش العيدان

زي نهش اللسان في العرض

الدنيا مالت مع ميلة الأحلام

وكسر النفوس عند القضاة

بقى عدالة وفرض

رمضان يعدي بنص هلال ويروح

الشهر نصه قهر

ونصه اللي باقي جروح

اكتب قصايد للصحاب

وقلبي عارف انها

مستحيل هتروح

يا رافع الأعمال لباب السما

ارفع دعايا

تترد في الروح

وجع ودار في البلد

من النوبة لمطروح

صبري كأنه ملح

على صديد مفتوح

أصرخ وأقول ميت آه

ذلي بقى مفضوح

يا ريتني كنت نبي

واختار نبوة نوح

اخد صحابي واهج

ويا روح ما بعدك روح

الأولة لعلاء

مع كل طلعة فجر أتذكرك وافرح

والتانية لعلاء

مش حافظ من الآيات إلا ألم نشرح

والتالتة لعلاء

سيرتك كعطر وهل بيملا ميت مطرح

صوتك بيسبق

بالحق ينطق

لا يخاف سجونهم

ولا حيطانهم

اشوف عيونك

كاسرة عيونهم

اشوف جراءتك

أقول غريبة

فيه ناس بتبعد

وناس قريبة

وناس بتزرع

في قلوبها طيبة

وناس بتحصد

قوتنا وعرقنا

تفتح بنوكها

تقفل طريقنا

تسجن عيالنا

لو يوم نطقنا

كان نفسي اروح

باب الفتوح

لمقام حبيبنا

مولانا سيدنا

أبو العيون

وارجع وازور

واسجد وادور

في صحن جامع

ابن طولون

بس الزيارة

مكتوبة لينا

جوه السجون

يا رب صبرك

على قلب عبدك

كله يهون

من قدك انت

ع الخلق أرحم

رمضان كريم

بس انت أكرم