دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

 -----------

 يا دموع ما بين شطين

يا ناى حزين

يا عدوك العارف منين

يحكم رقابنا م الفرات

و لآخر حدودك

يا نيل وجودنا من وجودك

و أرضنا السمرا اللى ناطقة 

بخيرك و جودك

بكياك سنين التاريخ

يا سبعتلاف من عمرنا

يا كل نبضة ف قلبنا

موالنا من غيرك عدم

إنت القدم 

شايل على ضهرك علم

و نشيدنا اسمك فيه نغم

يا ألف آه يا بلادى

كم لنيلك من اعادى

كم لنيلك من اعادى

صحصح يا سيدنا الشعب 

إرفع راياتك و فوق

مسحراتى الغضب

و الإحتجاج

و الشوق

 الجدر مادد لفوق

يحلم بفك الطوق

من ليل غميق لشروق

والصوت يشق الحلوق

و الروح بتنسج

من الجروح موال

الليل طويل

لكن النهار جوال

يا ألف أه يا ليل

يا ألف أه يا عين 

 الأوله نيلك

و التانية مواويلك

و التالتة قناديلك

الأوله نيلك يا مصر دا روحك

و التانية مواويلك تحكى على جروحك

و التالتة قناديلك تروى غيطان بوحك

الأوله نيلك يا مصر دا روحك سر الوجود و الحياة

و التانية مواويلك تحكى على جروحك و نقول معاها الله

و التالتة قناديلك تروى غيطان روحك بالحلم نمشى ف ضياه

الأوله آه

و التانية آه

و التالتة آه 

ومهما طال البعاد

لكل فجر معاد

مسحراتى يطول البلاد

أصرخ ليلاتى

إصحوا و فوقوا

لكل آتى

رمضان كريم

شهر و عظيم

فيه العظات و المعجزات و الإنتصار

الفجر لازم يولد نهار

و الصبح مولود من نور و نار

مسحراتى و فى إنتظار

الأمة ترفع راية إنتصار

رمضان كريم

يا نايم إصحى

وحد الرزاق