المنجد 

.

مسحراتي فى البلد ومنَجِّد 

وكل ليله كإني نازل أعيّد 

إنده معايا وقول يا شيخ سيد 

يا رب دايما نيجي في الأفراح 

. 

زغروطه ياام الحبيبه 

قولي دايمًا يا رب 

مع كل دقة وتر 

سمعت دقة قلب 

قلبين بيتجمَّعوا 

على الحلال والحب

. 

يا عم يا منجد 

شد الخيوط فى الالحفة وشدّد 

ما تخلّي واحد منِّنا يبْعد

 يا عم يا منجد 

. 

بحق شهر الصيام 

تملا المخده البيضا بالأحلام 

وتحشي كل الالحفه 

عشره ومحبه ودفا 

. 

أصل الوفا في النفوس 

بسم الله واضرب بالوتر والقوس 

خلي الفراق يبعد.. 

يا عم يا منجد

. 

بالإبره طرّز في الشِّلَتْ والملايه 

بسم الله واقرا السوره والآيه  

ما تخلي عين الحاسِدِين تحسد 

يا عم يا منجد

. 

زمن البعاد عَدّى 

ارسم لنا ع المخده 

يمامه بيضا وورده  

والْضُم قلوبنا بخيط حِنَيِّن واعقِد 

يا عم يا منجد 

. 

وارسم على الخُدَدِيه  

مِ الناحيه دِيه.. للناحيه ديه 

غزاله نازله على نبع الحنان تِوْرد  

يا عم يا منجد

. 

واعمل مساند للكنب 

خضرا فى لون ورق العنب 

لما نخطي مْنِ العتب 

تصبح جنينه تضمنا وتسعِد 

يا عم يا منجد 

.

وتَكَّايات .. 

لما الحبيب يتّكي 

ما تقولش آه .. 

ولا تشتكي 

. 

يا قطن يا ابيض ياللي إسمك قطن

 علشان خدوك الفلاحين بالحضن 

.

يا كل خيط نوّر لنا فى بيتنا 

على قد ما حبينا ..حبيتنا 

دي حاجات فرحنا لما تيجي وتِقْدَم 

ـ ربنا يعلم ـ                             

تصعب علينا لما تتجدد 

يا عم يا منجد 

. 

بالطبله دقه       وبقلبى دقه 

ياللي سامعني ما تقولش لأ 

. 

كـل اللـي جوزتهم.. راجـع أسحرهم 

ع الحب نيمْتُهم..  بالحـب اسهـرهم 

قلبين ما يتغيروا، طبـع الـوداد غـالب 

وانا اللـي طالب من الرحمن يكترهم 

. 

اصحى يا نايم 

رمضان كريــم 

.

عمر الصاوي

(من ديوان المسحراتي 1987)