كتاب الوطن

 دقيت على طبلتى 

على طبلتى دقيت

و صحيت على ندهتى

و بندهتى صحيت

يا قلوب ملاها الشوق

للعدل و الحرية

يا طريق و مليان شوك

أرواحنا لسه عفيه

الفجر نوره و نداه

جوه زهور شيلاه

تنشر عبيرها ف هواه

تملا حياتنا حياه

 دقيت على طبلتى

من قلب حلم اتولد

مسحراتى ليلاتى

سارح بطول المدد

الصوت بيرجع صدى

و الصبر ابن الجلد

بدد يا نور عتمتى

طبطب على طبلتى

يروى الندى سكتى

و الحلم يطرح بلد

****

إفتح كتاب الوطن

باب البطولة و الفداء

و احفر اسامى الكبار

كل اللى لبوا النداء

من أول اللى اتنسوا

و لاخر الشهداء

اكتب حروف من نور

و احفرها أرض و سماء

لا تنسى فى الهامش

تشير لاصل الداء

مزورين كدابين 

بيزيفوا بأهواء 

و ديابة تسرق تاريخ

او تدفنه فى صحراء

لكن بييجى اليوم

و لكل داء دواء

تشع شمس الحق

من الالف للياء

و الظلام للشروق

مسحراتى الغضب

و الإحتجاج 

والشوق

بحلم بفك الطوق

من ليل غميق لشروق

والصوت يشق الحلوق

و الروح بتنسج م الجروح موال

 الاوله اه

والتانية اه

والتالتة اه

الاوله دمنا

والتانية همنا

والتالته حلمنا

الاوله دمنا واصل السما بالارض

و التانية همنا جوانا طول و بعرض

والتالته حلمنا مكتوب علينا و فرض

الاوله دمنا واصل السما بالارض و حى يا شهيدنا

والتانية همنا جوانا طول و بعرض ولا عدو يكيدنا

و التالتة حلمنا مكتوب علينا و فرض نبنيه بسواعدنا

الاوله دمنا واصل السما بالأرض و حى يا شهيدنا و القصاص مكتوب

و التانية همنا جوانا طول و بعرض و لا عدو يكيدنا لو الطريق محسوب

والتالتة حلمنا مكتوب علينا و فرض نبنيه بسواعدنا ولا نتوه فى دروب 

الاوله اه 

والتانية اه

والتالته اه

و مهما طال البعاد

ومهما زاد العناد

مسحراتى بطول البلاد

اصرخ ليلاتى

اصحوا و فوقوا

لكل اتى 

رمضان كريم

شهر و عظيم 

فيه العظات

و المعجزات

و الانتصار

الفجر لازم يولد نهار

و الصبح مولود من نور و نار

مسحراتى و فى انتظار

الأمة ترفع راية إنتصار

رمضان كريم

يا نايم إصحى

وحد الرزاق