كان اسماعيل ياسين

اسمه اسماعيل ياسين

وكنا صغيرين

نقعد مترصصين

ع الشاشة مبحلقين

و نضحك لـمّا نفطس

و الأودة بينا تغطس

ولـمّا الفيلم يخلص

نبقى إسماعيل ياسين

نمشي لقدام نبرطع

و إيدينا مدلدلين

يا رب يا معين

إدّيني بُق زيّه

و أنا أضحّك جيش بزيّه

و أضحّك القلل

و اتنطط ع الملل

و اتكلّم به جريجي

مع الشاويش عطيّه

ومحمود المليجي

وشط إسكندرية

واخلّي البحر موجُه

يغني مونولوجُه

مع كل الصيادين

وتغني كمان معانا

مستشفى المجانين

لـمّا خبز الفطيرة

علشان ياخد إعانة

على مكتب المديرة

دي كل الناس جعانة

وكل الناس فقيرة

مستنيينه برّه

سواق أوتوبيس مسرّة

وخواجة يوناني مصري

والقَصْري على الحصيرة

وزينات صدقي تزغرط

وترد الزغاريط

عالم عبيط عبيط

عبيط عبيط عبيط

عبيط عبيط وماله

ما هوَّ ده جماله

يغور الكون بحاله

يحيا إسماعيل ياسين.

#أمين_حداد

#حلاوة_الروح